Met die nabetragting van my oefenlopie deur Namibië het ek so 'n paar riglyne vir my geformuleer.
1. Ek kan met die helfte minder klere klaarkom.
2. Vermy enige tydskedule. Volg jou innerlike horlosie, stop wanneer jy wil vir so lank jy wil. Hou slegs jou einddatum in die oog.
3. Moenie net op 'n kredietkaart vertrou nie. Sorg altyd vir kontant vir die dag as die tegnologie faal.
4. Maak 'n punt om meer te fotografeer, stilkamera én videokamera.
5. Ry korter afstande per dag.
6. 'n Mens moet meer tyd inruim om die motorfiets ten minste elke derde dag goed deur te gaan.
7. Vra nooit 'n motoris na die toestand van 'n pad nie. Hulle interpreteer die padoppervlakte anders as 'n motorfietsryer.
8. Wees vriendelik met grensbeamptes / polisie wat padblokkades beman, maar moenie gatkruip oor hoe ongelooflik mooi 'n land is of hoe vriendelik alle mense is nie. Hulle is slimmer as dit om daardeur tot 'n beter stemming gebring te word.
9. As 'n vroulike polisielid of vroulike soldaat 'n padblokkade beman, maak maar gereed om jou stofbril, kopdoek en valhelm af te haal. Hulle is baie deegliker as hul manlike kollegas.
10. Vermy 'n lodge of gastehuis waar die bestuurderes / eienares 'n enkeldame is wat elke aand saam met die gaste in die kroegie sit en kuier. Sy skeep êrens af. Nog nooit was ek by so 'n plek waar daar nie 'n paar goed in 'n kamer stukkend was of die ontbyt laat was omdat die werkers laat of glad nie opgedaag het nie. (Nee, ek is nie seksisties nie)
Ek sal die lysie uitbrei soos wat my ervarings op die fiets toeneem.
No comments:
Post a Comment